Бейнеткеш ауылдық клубының ұйымдастыруымен ауыл тұрғындарына арналған **«Бейнеткеш – менің ауылым»** атты мерекелік мәдени-көпшілік кеш кең көлемде өтіп, ауыл жұртшылығына ерекше көтеріңкі көңіл күй сыйлады.
Мерекелік шараның негізгі мақсаты – ауыл тұрғындарының басын қосып, туған жерге деген сүйіспеншілікті нығайту, ұлттық құндылықтарды ұлықтау, ел бірлігі мен ынтымағын дәріптеу болды.
Кеш аясында ең алдымен бүлдіршіндерге ерекше көңіл бөлінді. Арнайы ұйымдастырылған ойын алаңында қызықты сайыстар мен көңілді ойындар өткізіліп, балалардың шат күлкісі мерекенің сәнін келтірді. Бүлдіршіндерге балмұздақ үлестіріліп, көтеріңкі көңіл күй мен ұмытылмас әсер сыйланды.
Мерекелік концертте аудан мен ауылдың өнерпаздары әуелете ән шырқап, күмбірлеген күй орындап, ұлттық нақыштағы мың бұралған билері мен мазмұнды сахналық қойылымдарын көрермен назарына ұсынды. Әрбір өнер туындысы ауыл тұрғындарының ыстық ықыласына бөленіп, көрермендердің зор қошеметімен қабылданды.
Осындай тағылымды мәдени шаралар ауыл тұрғындарының өзара татулығы мен бірлігін одан әрі бекемдеп, туған өлкенің өткені мен бүгініне деген құрметті арттырып, елді мекеннің рухани өміріне серпін береді.
«Бейнеткеш – менің ауылым» атты мерекелік кеш ауылдың берекесі мен бірлігін, тұрғындардың туған жерге деген шынайы сүйіспеншілігін айқын көрсеткен мазмұнды әрі әсерлі мәдени шараға айналып, көпшіліктің көңілінен шықты.